முறையற்ற மாதவிடாய் - காரணம் அறிவீர்களா?

cover-image
முறையற்ற மாதவிடாய் - காரணம் அறிவீர்களா?

பெண்களுக்கு பூப்பெய்திய காலத்தில் இருந்து 28 நாட்களுக்கு ஒரு முறை மாதவிடாய் தோன்ற வேண்டும். ஆரம்ப காலங்களில் (13 வயதில் இருந்து 19 வயது வரை) சுழற்சி சீராகவில்லை என்றால், மிகவும் கவலைப்படத் தேவை இல்லை. போகப் போக சரியாகி விடும். 14 நாட்கள் ஈஸ்ட்ரோஜென் என்ற ஹார்மோனும்; பின் 14 நாட்கள் ப்ரோஜெஸ்ட்ரோன் என்ற ஹார்மோனும் சுரக்கும். அதன் பின்னர் மாதவிடாய் 3 நாட்களுக்கு அதிகமாகவும், மேலும் இரண்டு நாட்களுக்கு நீடித்து, மொத்தம் ஐந்து நாட்களுக்கு உதிரப்போக்கு இருக்கும்.

 

ஆரம்பித்த நாளில் இருந்து 28 நாட்கள் கணக்கு வைத்துக் கொள்ள வேண்டும். இது ஒரு சிலருக்கு முன்னும் பின்னும் இருக்கும். 21 நாட்கள் முதல் 35 நாட்கள் வரை மாறி இருப்பது சாதாரணமானது. நீங்கள் கவலை கொள்ளத் தேவை இல்லை. ஒரு சிலருக்கு இந்த சுழற்சி, 15 நாட்களுக்கு ஒரு முறை அல்லது இரண்டு மாதங்களுக்கு ஒரு முறை என்று இருந்தால், நிச்சயம் அதை சீராக்க வேண்டும். அப்போதுதான் வரும் நாட்களில் உடலில்  எந்தப் பிரச்சனையும் இல்லாமல் இருக்கும்.

 

முறையற்ற மாதவிடாய் தோன்ற காரணங்கள் 

 

  • மன அழுத்தம்

 

படிக்கும் பெண் குழந்தைகளுக்கு நல்ல மதிப்பெண் வாங்க வேண்டும் என்ற மன அழுத்தம் அதிகம் இருப்பதால் முறையற்ற மாதவிடாய் தோன்றுகிறது. சில குழந்தைகள் ஒரே இடத்தில் அமர்ந்து படிப்பதால், உடல் எடை அதிகரித்துக்கொண்டே போகும். இந்த இரண்டு வகை மாணவர்களுக்கும் மாதவிடாய் சுழற்சியில் கோளாறு ஏற்பட வாய்ப்பு இருக்கிறது. இப்படி, அதிக எடை கொழுப்புச்சத்து இருந்தாலும், குறைவான எடை சத்துக்குறைபாடு இருந்தாலும், கருமுட்டை கர்ப்பப்பைக்கு வருவதில் தடை ஏற்பட்டு, முறையற்ற மாதவிடாய் (menstruation) சுழற்சி ஏற்படும். அலுவலக பணிபுரியும் பெண்களுக்கு வேலை மன உளைச்சல் காரணமாகவும் முறையற்ற சுழற்சி ஏற்படும்.     

  • பிரசவத்திற்கு பின்

 சில பெண்களுக்கு குழந்தைப்பேறுக்கு பின்னர் சீரான மாதவிடாய் வருவதில்லை. நல்ல உணவு சாப்பிட வேண்டும் என்று, அதிக கொழுப்பு உள்ள உணவை சாப்பிடுவதால் இந்தப் பிரச்சனைக்கு ஆளாகிறார்கள். அறுவை சிகிச்சை பிரசவம் ஆனவர்கள் வயிற்றின் தையலில் அதிக கவனம் கொண்டு உடல் உழைப்பு இல்லாமல் அதிக ஓய்வும் வயிற்று பகுதியின் கொழுப்பு சேர்மானத்திற்கு முக்கிய காரணம்.  

 

  • தைராய்டு பிரச்சனை

 தைராய்டு பிரச்சனை உள்ளவர்கள், உடல் எடையில் திடீர் மாற்றங்கள் ஏற்படும்; மேலும் சோர்வாக உணர்வார்கள். இவர்களுக்கும், மாதவிடாய் சுழற்சி சீராக இருக்காது. சில வகை தைராய்டு கருவுருதலையும் தடைபடுத்துகிறது. தகுந்த மருத்துவரை அணுகுவது ஒன்றே தீர்வு.  

 

  • மெனோபாஸ் (menopause) 

நாற்பது வயதை நெருங்கும் பெண்களுக்கு மாதவிடாய் முற்றிலுமாக நின்று போகும் தருணமே மெனோபாஸ் எனப்படும். மெனோபாஸ் வரப்போகும் காரணங்களினால், முறையற்ற மாதவிடாய் சுழற்சி இருக்கும். அது சாதாரணமானதுதான். ஆனால், அதிக உதிரப்போக்கு இருந்தால் பிரச்சனை.  

 

  • ஹார்மோன் பிரச்சனைகள்

 ஹார்மோன் சரியாக சுரக்காத காரணத்தினால், பிசிஓஎஸ் (PCOS/PCOD) போன்ற நோய்கள் ஏற்பட்டு மாதவிடாய் சுழற்சியில் பிரச்சனை ஏற்படுத்தும். 

 

  • குறைந்த உடல் உழைப்பு: 

உடல் உழைப்பு இல்லாமல் செயலற்று இருந்தால், நிச்சயம் உடலில் பிரச்சனைகள் மெதுமெதுவாக ஆரம்பமாகும். அறுவை சிகிச்சைக்குப்பின் நடமாடுவதை குறைத்துக் கொள்வார்கள். படிக்க வேண்டும் என்ற தருணங்களில், இப்படி தவிர்க்க முடியாத காரணங்களினால் செயலற்று இருப்பது. 

 

மேற்கூறிய காரணங்களை முற்றிலுமாக தடுக்க முடியாவிட்டாலும், பின்வரும் முறைகளை பின்பற்றுவதன்  மூலம் சுழற்சியை ஓரளவு கட்டுக்குள் கொண்டு வரலாம்.  

 

  • அதிகமாக ஜங்க் ஃபுட் (நொறுக்கு தீனிகள்) சாப்பிடுவது உடல் கோளாறுகளை ஏற்படுத்தி உடல்பருமனுக்குக் காரணமாகும். இது, மாதவிடாயில் பிரச்னையை ஏற்படுத்தும்.

 

  • அதிக மனஅழுத்தத்துக்கு உள்ளானவர்களுக்கு, அதன் காரணமாக, கருமுட்டை உற்பத்தி பாதிப்படையும். அலுவல்ரீதியான அழுத்தம் அல்லது குடும்பப் பிரச்னை காரணமாக அதிகளவு அழுத்தம் ஏற்படும்போது இந்தப் பிரச்னை தலைகாட்டும். நடைபயிற்சி செய்வது, சத்தான உணவுகளை சாப்பிடுவது, தேவையான அளவு தண்ணீர் குடிப்பது போன்ற வாழ்வியல் முறைகளில் மாற்றங்கள் ஏற்படுத்திக்கொள்வதன் மூலம் இதை சரிசெய்யலாம்.

 

  • புரதம், ஆன்டிஆக்ஸிடென்ட் சத்துகள் இருக்கும் உணவுகளை குறைந்த அளவில் சாப்பிடும்போது, அட்ரினல் மற்றும் தைராய்டு சுரப்பிகளில் பிரச்னை ஏற்படும். இவர்கள், சரியான உணவுப் பழக்கத்துக்கு மாறினாலே போதுமானது.

 

  • திடீரென்று உடல் எடை குறைப்பது/அதிகரிப்பது, உடல் செயல்பாடுகளில் பாதிப்பை ஏற்படுத்தும். இது, மாதவிடாய்ப் பிரச்னையை ஏற்படுத்தும்.

 

பெண்கள் தங்கள் உடல் நலனில் அக்கறை எடுத்துக்கொள்வது அவசியம். இன்றைய மருத்துவ முறையில் எல்லாவித குறைபாடுகளையும் கண்டறிந்து அதற்கு தகுந்த சிகிச்சையின் மூலம் தீர்வும் காணலாம்.

logo

Select Language

down - arrow
Personalizing BabyChakra just for you!
This may take a moment!